ភ្នំពេញ៖ ស្ពានបេតុងឫស្សីកែវ ចាប់ផ្តើមបើកឱ្យគ្រប់យានជំនិះឆ្លងកាត់ជាបណ្តោះអាសន្ននៅព្រឹកថ្ងៃនេះតទៅ ដើម្បីសម្រួលដល់ពលរដ្ឋធ្វើដំណើរនាឱកាសបុណ្យចូលឆ្នាំប្រពៃណីខ្មែរ។

នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានអនុញ្ញាតឱ្យរដ្ឋបាលរាជធានីភ្នំពេញបើកឱ្យពលរដ្ឋធ្វើដំណើរឆ្លងកាត់ស្ពានបេតុងឫស្សីកែវជាបណ្តោះអាសន្នចាប់ពីថ្ងៃទី១០ ខែមេសា ឆ្នាំ២០២៣ តទៅ។ ចំណែកស្ពានដែកបាឡេឫស្សីកែវ ដែលសង់នៅទន្ទឹមគ្នានឹងស្ពានថ្មី ត្រូវបានបិទឈប់ឱ្យឆ្លងកាត់ហើយ។

តាមសេចក្តីជូនដំណឹងរបស់រដ្ឋបាលរាជធានីភ្នំពេញ ការអនុញ្ញាតឱ្យដំណើរការស្ពានបេតុងឫស្សីកែវ ក្រោយពីត្រូវបានសាងសង់សឹងតែរួចរាល់ ពោលនៅសេសសល់ការងារមួយចំនួនតូច ដែលមិនប៉ះពាល់ដល់ការបើកចរាចរជាបណ្តោះអាសន្នឡើយ។

ការបើកឱ្យដំណើរការជាបណ្តោះអាសន្ននូវស្ពានបេតុងឫស្សីកែវ គឺដើម្បីជួយសម្រួលដល់លំហូរចរាចរ និងការធ្វើដំណើររបស់ប្រជាពលរដ្ឋនាឱកាសបុណ្យចូលឆ្នាំថ្មី ប្រពៃណីជាតិខ្មែរ និងជួយដោះស្រាយការកកស្ទះចរាចរនៅតំបន់ខណ្ឌពាក់ព័ន្ធ។ ទន្ទឹមនឹងនេះ ដើម្បីធានានូវសណ្តាប់ធ្នាប់ និងបញ្ចៀសការកកស្ទះចរាចរពី ស្ពានបេតុងឫស្សីកែវឆ្លងទន្លេសាប ឆ្លងកាត់ផ្លូវមុខស្ពានដែកបេឡេ។

គូសបញ្ជាក់ថា ស្ពានបេតុងឫស្សីកែវ ឆ្លងទន្លេសាប ស្ថិតនៅខណ្ឌជ្រោយចង្វារ និងខណ្ឌឫស្សីកែវ រាជធានីភ្នំពេញ ត្រូវបានបើកការដ្ឋានសាងសង់ កាលពីខែតុលា ឆ្នាំ២០១៧ ក្រោមអធិបតីភាពនាយករដ្ឋមន្ត្រីកម្ពុជាសម្តេចតេជោ ហ៊ុន សែន និងទទួលការសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC)៕